Mae Georgie Richards yn astudio am radd MSc mewn Seicoleg ym Mhrifysgol Caerdydd.
Fel rhan o’m gradd, cwblheais leoliad gwaith 12 wythnos yn DECIPHer, a dyma yw profiad mwyaf ystyrlon fy nhaith ôl-raddedig erbyn hyn.
Rwyf bob amser wedi cael fy nenu at seicoleg gymdeithasol ac iechyd, yn enwedig y ffyrdd y gallwn gefnogi lles trwy ddulliau cyfannol a rhai sy’n seiliedig ar natur. Mae fy niddordeb mewn anifeiliaid therapi, gweithgareddau awyr agored a dulliau amgen ar gyfer gwella iechyd meddwl a chorfforol yn deillio o’m gradd israddedig mewn Anthroswoleg, lle archwiliais berthnasoedd dynol-anifeiliaid a’u heffaith ar les. Gwnaeth DECIPHer argraff arnaf yn syth oherwydd prosiect PHIRST-Insight gyda Rhaglen Gweithleoedd Iach Gogledd Gwlad yr Haf, sy’n gwerthuso iechyd a lles yn y gweithle. Drwy fy lleoliad, cefais gyfle hefyd i gyfrannu at brosiect RISE, astudiaeth sy’n canolbwyntio ar leihau anghydraddoldebau bwyd ledled Cymru.
Wrth ddechrau’r lleoliad hwn, roeddwn i’n gobeithio ymgolli mewn ymchwil, cymhwyso a datblygu’r sgiliau a ddysgais yn y brifysgol, a magu hyder mewn amgylchedd ymchwil proffesiynol. Roeddwn i hefyd eisiau’r cyfle i rwydweithio, cydweithio, a chael syniad cliriach o’r llwybrau gyrfaol sydd ar gael ym maes ymchwil ac iechyd y cyhoedd. Aeth DECIPHer y tu hwnt i bob disgwyliad.
Fy lleoliad yn DECIPHer oedd profiad mwyaf gwerth chweil fy nhaith MSc; o’r eiliad y cyrhaeddais roeddwn i’n teimlo fy mod i wedi cael cefnogaeth wirioneddol. Roedd y tîm yn gyfeillgar, yn hawdd mynd ato, ac wedi buddsoddi yn fy natblygiad. Drwy gydol y cyfnod, bûm yn cymryd rhan mewn ystod eang o weithgareddau ymchwil, hyfforddiant o gyrsiau byr DECIPHer a gweithdai dulliau creadigol. Cyfrannais at ddulliau ansoddol a meintiol – casglu data, dadansoddi, codio, dehongli data, adolygiadau llenyddiaeth, cyflwyniadau, a bues i mewn dau ddiwrnod i ffwrdd ar gyfer prosiectau ymchwil a gynigiodd fewnwelediad i strategaethua ymchwil ehangach a chydweithio fel rhan o dîm. Cefais gyfle hefyd i weithio gydag intern haf israddedig a’i helpu i ymgartrefu, a oedd yn brofiad gwerth chweil a’m helpodd i ddatblygu sgiliau cyfathrebu.
‘Y peth mwyaf i mi ei ddysgu o’m hamser yn DECIPHer yw’r gefnogaeth eithriadol gan fy ngoruchwylwyr.’
Heb os, cysylltiad a chreadigrwydd fu rhai o’r adegau mwyaf gwerth chweil. Roeddwn i wrth fy modd yn cydweithio mewn timau amlddisgyblaethol, rhwydweithio ag ymchwilwyr ar draws prosiectau, dylunio posteri a deunyddiau ymchwil a phlymio i godio a dadansoddi – yn enwedig gweld patrymau’n dod i’r amlwg o ddata. Rwyf hefyd yn ddiolchgar am y cyfeillgarwch a ffurfiwyd gydag interniaid eraill a wnaeth y profiad hyd yn oed yn fwy pleserus. Gwnaethon ni drefnu digwyddiadau cymdeithasol y tu allan i’r gwaith fel rasio ceir gwyllt, ioga a mynd i glybiau nos!
Y peth mwyaf a ddysgais o’m hamser yn DECIPHer yw’r gefnogaeth eithriadol gan fy ngoruchwylwyr, Dr Samantha Garay a Dr Jemma Hawkins. Fe wnaethon nhw gynnig y cydbwysedd perffaith rhwng arweiniad ac annibyniaeth, gan annog fy natblygiad ac i achub y blaen wrth fod ar gael bob amser pan oedd angen cyfarwyddyd arnaf. Agorodd eu mentora fy llygaid i’r nifer o bosibiliadau gyrfaol ym maes ymchwil ac iechyd y cyhoedd. Cryfhaodd y profiadau hyn a’u hanogaeth fy sgiliau ymchwil ymarferol a’m datblygiad personol.
Gan edrych ymlaen, rwy’n archwilio sawl llwybr gyrfaol, gan gynnwys y posibilrwydd o PhD yn ogystal â rolau cynorthwyydd ymchwil. Mae fy niddordebau’n parhau i fod wedi’u gwreiddio mewn ymchwil ac iechyd y cyhoedd ac mae’r lleoliad hwn wedi tynnu sylw at y cyfleoedd di-ri sy’n bodoli yn y meysydd hyn. Mae DECIPHer wedi rhoi hyder i mi barhau i ddilyn gwaith sy’n cyd-fynd â’m gwerthoedd: cefnogi lles a chyfrannu newid sy’n seiliedig ar dystiolaeth.
